Timu za IAA SC ya Arusha na Misitu FC ya Tanga zimeanza kwa ushindi katika fainali za Ligi ya Mikoa zinazoendelea kwenye Uwanja wa Sheikh Amri Abeid, Arusha.
IAA iliifunga Bara FC ya Dar es Salaam mabao 2-0 katika mchezo wa kwanza wa Kundi A, huku Misitu FC ikiibuka na ushindi wa mabao 3-2 dhidi ya Igunga FC.
Fainali hizo zinajumuisha timu nane bora kutoka hatua za makundi zilizomalizika hivi karibuni. Zimegawanywa katika makundi mawili, ambapo mshindi wa kila kundi atapanda moja kwa moja kwenda Ligi Daraja la Kwanza (Championship), na timu zitakazoshika nafasi ya tatu zitacheza mchujo maalum.
Katika Kundi B, zipo timu za Kajuna FC (Kigoma), Cargo FC (Dar es Salaam), Bandari SC (Mtwara) na Mabao FC (Shinyanga). Mechi mbili za kundi hilo zilitarajiwa kuchezwa jana, Bandari dhidi ya Mabao FC, na Kajuna FC dhidi ya Cargo FC.
Ushindani kwenye fainali hizi ni mkubwa na umekuwa kivutio kikubwa kwa mashabiki wa soka, huku makocha wakitumia nafasi hii kuwaonesha vipaji vipya na kuandaa timu kwa ngazi za juu zaidi. Mshindi wa mchujo wa tatu bora atakutana na timu iliyoshindwa katika play-off ya Championship ili kupigania nafasi ya kupanda.
