Benki ya KCB Tanzania kwa kushirikiana na Mikoko Development Foundation, imetekeleza mpango wa kimkakati wa upandaji miti katika eneo la Kondo, ambapo miti 1,000 imepandwa ndani ya eneo muhimu la vyanzo vya maji ikiwa ni sehemu ya ajenda yake pana ya uendelevu wa mazingira.
Katika mpango huo, kila taasisi imechangia miti 500, hatua inayokwenda sambamba na maadhimisho ya siku za kimataifa za Siku ya Misitu Duniani (Machi 21) na Siku ya Maji Duniani (Machi 22). Maadhimisho hayo yanaangazia uhusiano wa karibu kati ya mifumo ya ikolojia ya misitu, usalama wa maji, na ustahimilivu wa kijamii na kiuchumi kwa muda mrefu—ambayo ni maeneo muhimu katika mkakati wa KCB Tanzania wa athari za mazingira na jamii.
Akizungumzia mpango huo, Mkuu wa Masuala ya Biashara na Uendelevu katika Benki ya KCB, Christina Manyenye alisema:
“Mpango huu unaakisi mwelekeo wetu wa kimkakati katika kurejesha mifumo ya ikolojia kama njia ya kuimarisha usalama wa maji na ustahimilivu dhidi ya mabadiliko ya tabianchi. Kupitia ushirikiano madhubuti, tunaendeleza hatua endelevu zinazozalisha thamani kwa mazingira na jamii kwa ujumla.”
Ushirikiano huo unaonyesha dhamira ya pamoja katika kukuza uendelevu, kwa kutumia utaalamu wa ndani na kuimarisha thamani ya pamoja ili kufikia matokeo yanayopimika katika uhifadhi wa mazingira na kuongeza ustahimilivu wa mifumo ya ikolojia katika ngazi ya jamii.
Mbali na upandaji miti, mpango huu unalenga pia kuongeza uelewa wa masuala ya mazingira, kuimarisha uwajibikaji wa taasisi, na kuhamasisha matumizi bora ya rasilimali asilia ndani ya shughuli za KCB Tanzania pamoja na wadau wake.
Mradi huu unachangia moja kwa moja katika kufanikisha Malengo ya Maendeleo Endelevu ya Umoja wa Mataifa (SDGs), hususan SDG 6 (Maji Safi na Usafi wa Mazingira), SDG 13 (Hatua dhidi ya Mabadiliko ya Tabianchi) na SDG 15 (Uhai wa Nchi Kavu), jambo linaloonesha ulinganifu na viwango vya kimataifa vya uendelevu.
Kupitia hatua hiyo, KCB Tanzania inaendelea kuonesha uongozi katika kujumuisha ajenda ya uendelevu ndani ya mkakati wake wa biashara, kwa lengo la kuleta thamani ya muda mrefu, kuongeza ustahimilivu, na kuchangia malengo mapana ya kijamii na kimazingira ya KCB Group.
