Klabu ya Simba SC imepata pigo kubwa kuelekea michezo muhimu ya Ligi ya Mabingwa Afrika (CAFCL) baada ya kuthibitishwa kuwa haitakuwa na huduma ya mlinda mlango wake wa kwanza, Moussa Camara, kwa kipindi kirefu.
Kipa huyo raia wa Guinea, ambaye amekuwa mhimili muhimu wa kikosi cha Simba msimu huu kutokana na kiwango chake cha juu na uzoefu wa mashindano ya kimataifa, amelazimika kukaa nje ya uwanja baada ya kupata jeraha la goti lililohitaji kufanyiwa upasuaji nchini Morocco.
Kwa mujibu wa taarifa kutoka ndani ya klabu, jeraha hilo ni kubwa na linahitaji muda mrefu wa uangalizi wa kitabibu na urejeshaji wa mwili, hali inayomfanya Camara kutarajiwa kurejea uwanjani hadi Aprili 2026. Kutokana na hali hiyo, hatashiriki michezo iliyosalia ya hatua ya makundi ya CAFCL na kuna uwezekano mkubwa pia akakosa hatua za mbele endapo Simba itafanikiwa kusonga mbele kwenye michuano hiyo.
Kutokuwepo kwa Camara kunatajwa kuwa changamoto kubwa kwa benchi la ufundi na uongozi wa klabu, hasa ikizingatiwa umuhimu wa michezo ya kimataifa inayohitaji uzoefu na uthabiti mkubwa langoni. Kwa sasa, Simba italazimika kumtegemea Hussein Abel kama chaguo la kwanza au kufikiria kutafuta mlinda mlango mbadala wa dharura kupitia dirisha dogo la usajili ili kuhakikisha ndoto ya kufanya vizuri barani Afrika haiyumbi.
