Wafugaji nchini wameshauriwa kwa dhati kutumia virutubisho vya asili katika shughuli zao za ufugaji, ili kukuza tija na kudhibiti matumizi ya kemikali zinazoweza kuwa na madhara kwa mifugo na binadamu.
Wito huo ulitolewa na Mkurugenzi Mkuu wa Taasisi ya Utafiti wa Mifugo Tanzania (TALIRI), Prof. Erick Vitus Komba, wakati akiwasilisha bidhaa mpya za virutubisho asilia kwa waandishi wa habari katika banda la TALIRI, wakati wa maonesho ya Nanenane yanayoendelea kwenye viwanja vya Nzuguni, jijini Dodoma.
Kupunguza Matumizi ya Kemikali: Mwelekeo wa Kimataifa
Prof. Komba alisistiza kuwa mwelekeo wa sasa duniani ni kuzingatia uzalishaji wa vyakula vilivyo safi na bila mabaki kemikali, kwani matumizi mengi ya kemikali katika chakula na mifugo yanaweza kuathiri afya ya binadamu kwa muda mrefu.
“Bidhaa hizi hazina kemikali; ni virutubisho vya asili vinavyosaidia kuongeza bakteria mwema kwenye mfumo wa mmeng’enyo wa mnyama, hivyo kuimarisha kinga ya mwili na kuharakisha ukuzi wa mifugo,” alisema Prof. Komba.
Aliongeza kuwa matumizi ya virutubisho hivi yatawafanya wafugaji kupunguza utegemezi wa madawa ya kemikali, huku mifugo ikiwa na afya bora na kukua kwa ufanisi zaidi.
Uthibitisho wa Ufanisi wa Bidhaa
Paruku Emmanuel, mzalishaji na muuzaji wa bidhaa hizo kutoka Indonesia, alibainisha kuwa teknolojia hii imefanyiwa majaribio na TALIRI kwa muda wa miaka mitatu na kuthibitisha kuwa ina faida kwa mifugo na mazao.
“Tumeifanyia utafiti bidhaa hizi kwa aina mbalimbali za mifugo kama kuku na ng’ombe, na matokeo yamekuwa mazuri. Mifugo haitakuwa na mabaki ya kemikali mwilini, hivyo kuhakikisha nyama na maziwa yanayotokana ni salama kwa binadamu,”* alisema Paruku.
Alitaka wafugaji kushiriki kwa vitendo katika matumizi ya bidhaa hizi, kwani zina uwezo wa kuongeza tija na kuwawezesha kufuga kwa njia ya kisasa na salama.
