Kampuni ya Jayrutty imeendelea kuthibitisha kuwa ni mwekezaji mkubwa na wa kweli katika sekta ya michezo, baada ya kuingia rasmi katika soka la Rwanda kwa kutoa udhamini wa vifaa kwa vilabu vikubwa vinne pamoja na Shirikisho la Mpira wa Miguu nchini humo.
Hatua hiyo ilibainishwa jana wakati wa mkutano na waandishi wa habari ulioongozwa na Joe Rwegasira, ambapo Jayrutty ilitangaza mpango wake wa kushiriki kikamilifu katika maendeleo ya soka la Rwanda. Uamuzi huo unaonyesha wazi uwezo wa kampuni hiyo kupanua biashara yake nje ya mipaka ya Tanzania.
Rwanda ni miongoni mwa nchi zinazokua kwa kasi katika sekta ya michezo barani Afrika, jambo linaloifanya kuwa soko lenye fursa kubwa za uwekezaji. Katika miaka ya karibuni, taifa hilo limekuwa mstari wa mbele kudhamini vilabu vikubwa nje ya Afrika, hivyo kuvutia wawekezaji na wadau mbalimbali wa michezo.
Kwa muktadha huo, kuingia kwa Jayrutty nchini Rwanda ni hatua muhimu kwa kampuni hiyo ya Kitanzania katika kupenya soko la kimataifa, kupata uzoefu mpya na kujijengea jina kubwa zaidi barani Afrika.
Kwa muda mrefu, wawekezaji wengi wa ndani wamekuwa wakijikita zaidi katika kufanya biashara ndani ya nchi, hata baada ya kudhamini vilabu vikubwa kama Simba na Yanga, bila kupanua wigo wao nje ya Tanzania. Hata hivyo, uamuzi wa Jayrutty kwenda kuwekeza Rwanda unaonesha mabadiliko ya fikra na dira mpya ya kibiashara.
Hatua hiyo pia imeitambulisha Tanzania 🇹🇿 kimataifa kupitia michezo, na kuthibitisha kuwa Klabu ya Simba haikudhaminiwa na mwekezaji mdogo, bali kampuni yenye uwezo mkubwa na ushawishi unaoendelea kukua barani Afrika.
Wadau wa michezo wanaeleza kuwa mwekezaji wa aina hii anapaswa kuungwa mkono na kutengenezewa mazingira rafiki ili aendelee kuwekeza zaidi katika sekta ya michezo, kwa manufaa ya vilabu, mashabiki na maendeleo ya michezo nchini.
