Wananchi wa Kijiji cha Mapili, Wilaya ya Mlele mkoani Katavi, wamemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuwawezesha kuboresha maisha yao kupitia mradi wa umeme uliotekelezwa na Wakala wa Nishati Vijijini (REA).
Shukrani hizo zilitolewa Agosti 11, 2025, wakati wa kampeni maalum ya uhamasishaji wa matumizi ya umeme kwa shughuli za kiuchumi inayotekelezwa na REA katika maeneo mbalimbali nchini.
Wanufaika Wazungumza Mwalimu mstaafu na mkazi wa Mapili, Amos Katawa, alisema umeme umebadilisha maisha yao kwa kuongeza mwanga usiku, kuruhusu shughuli za maendeleo kuendelea hadi usiku, na kuongeza fursa za ajira kwa vijana.
“Kabla ya kupata umeme, usiku tulikuwa gizani, sasa tunaishi kwa amani na hata vijana wamepata ajira. Tunaweza kutazama habari na kuendelea na shughuli hadi usiku,” alisema Katawa.
Fursa za Kazi na Biashara Fundi uchomeleaji Mrisho Mussa alisema kabla ya mradi huo walilazimika kwenda mjini Inyonga kufanya kazi, jambo lililoongeza gharama na kupoteza muda.
“Sasa kila kitu tunafanya hapa kijijini. Hakuna haja ya kukimbilia mjini. Rais Samia ametufikishia kila kitu,” alisema Mussa.
Kuboresha Maisha ya Wanawake Mkazi mwingine, Scholastica Kitwewe, alisema umeme umepunguza mzigo wa kazi za nyumbani kwa wanawake kwani sasa kuna mashine za kusaga na kukoboa nafaka kijijini, jambo linalookoa muda na nguvu.
Ajira na Mafunzo Fundi seremala Elasto Mwampaya maarufu Fundi Lam alisema umeme umewezesha kukua kwa karakana yake, kuongeza ubora wa bidhaa na kufungua soko hadi mikoa mingine. Ameajiri vijana wengi na kuwapa mafunzo ya kutumia vifaa vya kisasa vinavyotumia umeme.
Viongozi wa Kijiji na Wilaya Wapongeza Mwenyekiti wa Serikali ya Kijiji, Anthony Mwijuma, alisema mradi huo umeleta ajira, biashara ndogo na huduma mpya kijijini.
Msimamizi wa miradi ya REA mkoani Katavi, Mha. Gilbert Furia, alisema vijiji vyote mkoani humo vimeunganishwa na umeme, na kazi inayoendelea sasa ni kusambaza huduma hiyo kwenye vitongoji. Hadi sasa, vitongoji 176 kati ya 251 katika Halmashauri za Mlele na Mpimbwe vimefikiwa.
Katibu Tawala wa Wilaya ya Mlele, Yahaya Mbulu, alisema mradi wa umeme umeleta mabadiliko makubwa kwa maendeleo ya eneo hilo.
“Mlele ya jana siyo ya leo. Hatua kubwa imepigwa,” alisisitiza Mbulu.
