Kituo cha Kimataifa cha Dini na Utamaduni (SCJTV) kimesema wasiwasi unaongezeka kuhusu ubaguzi na unyanyapaa dhidi ya wanachama wa Shincheonji Kanisa la Yesu, Hema la Hekalu la Ushuhuda, waliopo nje ya Korea Kusini.
Taarifa hiyo imekuja baada ya shirika la kimataifa la haki za binadamu, *Coordination des Associations et Particuliers pour la Liberté de Conscience (CAP LC), kuwasilisha taarifa ya pamoja ya maandishi katika *Baraza la Haki za Binadamu la Umoja wa Mataifa, likisisitiza umuhimu wa kuhakikisha maamuzi ya kiutawala na kimahakama yanazingatia ushahidi unaoweza kuthibitishwa na viwango vya wazi vya kisheria.
Kwa mujibu wa taarifa iliyotolewa Julai 9, 2026, CAP LC iliwasilisha taarifa hiyo kwa Baraza la Haki za Binadamu la Umoja wa Mataifa pamoja na shirika lisilo la kiserikali la United for Human Rights, likieleza wasiwasi kuhusu kuenea kwa ubaguzi na unyanyapaa dhidi ya wanachama wa Shincheonji Kanisa la Yesu.
Taarifa hiyo iliwasilishwa katika Kikao cha 62 cha Baraza la Haki za Binadamu la Umoja wa Mataifa, kilichofanyika Juni 15 hadi Julai 10, 2026, chini ya Ajenda Na. 3 inayohusu kukuza na kulinda haki zote za binadamu, ikiwemo haki za kiraia, kisiasa, kiuchumi, kijamii na kitamaduni pamoja na haki ya maendeleo.
Katika taarifa yake, CAP LC ilijikita zaidi katika viwango vinavyopaswa kutumika kutathmini masuala ya haki za binadamu kuliko mabishano yanayohusu Shincheonji Kanisa la Yesu yenyewe.
Shirika hilo lilieleza wasiwasi kwamba mitazamo hasi na taarifa ambazo hazijathibitishwa, zikiwemo taarifa zinazotengenezwa nchini Korea Kusini na kusambazwa katika nchi nyingine, zinaweza kuwa na athari kubwa kwa maoni ya umma pamoja na maamuzi ya kiutawala na kimahakama.
Kwa msingi huo, CAP LC imezitaka serikali kuhakikisha kuwa maamuzi yoyote yanayohusu Shincheonji Kanisa la Yesu yanategemea ushahidi unaoweza kuthibitishwa na viwango vya wazi vya kisheria.
Shincheonji Kanisa la Yesu limesema hatua hiyo inaonyesha umuhimu wa kulinda haki za makundi ya kidini yaliyo wachache, likisema kuwa endapo unyanyapaa usio na msingi utaruhusiwa kukubalika kimataifa, makundi mengine ya kidini yaliyo wachache yanaweza pia kukabiliwa na hukumu na ubaguzi wa aina hiyo.
Kwa mujibu wa kanisa hilo, hali hiyo inaonyesha wajibu wa mataifa kuhakikisha kuwa haki za makundi yote ya kidini yaliyo wachache zinalindwa kwa kuzingatia viwango vya kimataifa vya haki za binadamu.
CAP LC, ambalo lina hadhi maalum ya ushauri katika Baraza la Uchumi na Masuala ya Kijamii la Umoja wa Mataifa (ECOSOC), ni shirika la kimataifa lisilo la kiserikali linalojihusisha kwa muda mrefu na masuala ya uhuru wa dini katika ngazi ya kimataifa.
Hapo awali, CAP LC limewasilisha mbele ya Umoja wa Mataifa masuala yanayohusu mateso dhidi ya Church of Almighty God nchini China, pamoja na wasiwasi kuhusu ukiukwaji wa uhuru wa dini uliotokana na ombi la Serikali ya Japan la kutaka kutolewa kwa amri ya kuvunjwa kwa taasisi inayojulikana rasmi kama *Family Federation for World Peace and Unification, ambayo awali ilifahamika kama *Unification Church.
Shincheonji Kanisa la Yesu limesema ukweli kwamba shirika la kimataifa lisilo la kiserikali limewasilisha taarifa kuhusu suala hilo unaonyesha kuwa kesi inayolihusu kanisa hilo si jambo la ndani la Korea Kusini pekee, bali pia imeanza kuvutia uangalizi wa kimataifa kwa kuzingatia viwango vya kimataifa vya haki za binadamu.
Unyanyapaa Bila Ushahidi
Taarifa hiyo pia imetaja mifano kutoka Uingereza na nchi zinazozungumza Kijerumani, ikisema mitazamo hasi dhidi ya wanachama wa Shincheonji Kanisa la Yesu imevuka mipaka ya maoni ya umma na kusababisha taratibu za kiutawala pamoja na kuingiliwa kwa maisha ya kijamii ya baadhi ya watu.
Kwa mujibu wa taarifa hiyo, mifano hiyo inaonyesha namna unyanyapaa usio na ushahidi wa kutosha unavyoweza kugeuka kuwa ubaguzi wa kijamii na hatimaye kuathiri haki na maisha ya watu binafsi.
CAP LC imesisitiza umuhimu wa kuhakikisha kuwa hatua za serikali na taasisi za mahakama dhidi ya makundi ya kidini zinachukuliwa kwa kuzingatia ushahidi unaoweza kuthibitishwa, taratibu za haki na viwango vya kimataifa vya haki za binadamu.
