Kamati ya Kudumu ya Bunge ya Ustawi na Maendeleo ya Jamii imepongeza hatua ya Serikali kulipa deni la muda mrefu la michango ya hifadhi ya jamii kupitia Mfuko wa Hifadhi ya Jamii kwa Watumishi wa Umma (PSSSF), ikieleza kuwa hatua hiyo imechangia kuboresha ulipaji wa mafao kwa wastaafu.
Mwenyekiti wa kamati hiyo, Hawa Mchafu, ametoa pongezi hizo leo, Oktoba 16, 2026, jijini Dodoma, w
akati kamati ilipopokea taarifa ya mwenendo wa PSSSF, ikiwamo ukusanyaji wa michango ya watumishi wa umma, mafanikio, changamoto na hatua zinazochukuliwa kuzitatua.
Mchafu amesema kulipwa kwa deni hilo kumeisaidia mifuko ya hifadhi ya jamii kuimarisha uwezo wake wa kutekeleza majukumu, hususan kulipa mafao kwa wastaafu. Pia amempongeza Waziri wa Nchi, Ofisi ya Waziri Mkuu – Kazi, Ajira na Mahusiano, Deus Sangu, kwa usimamizi wa mifuko hiyo.
Akitoa taarifa kwa kamati, Sangu amesema Serikali imelipa Sh trilioni 2.09 kupitia hati fungani kwa ajili ya michango ya wanachama ambayo haikuwasilishwa kwenye mfuko kwa kipindi cha utumishi kabla ya mwaka 1999.
Amesema katika kipindi cha Julai hadi Septemba 2026, PSSSF ilikusanya Sh bilioni 839.98, akieleza kuwa matumizi ya mifumo ya Teknolojia ya Habari na Mawasiliano (TEHAMA) yamechangia kuboresha ukusanyaji na ufuatiliaji wa michango.
Ametaja mfumo wa Billing Portal kuwa miongoni mwa mifumo inayotumika kurahisisha michakato ya utozaji na kufuatilia michango ya wanachama.
Kwa upande wake, Mkurugenzi Mkuu wa PSSSF, Fortunatus Magambo, amesema mfuko huo unaendelea kutumia mifumo ya kidijitali kurahisisha upatikanaji wa huduma kwa wanachama na kuongeza ufanisi katika utoaji wa huduma.
Hatua hizo zinalenga kuimarisha usimamizi wa michango na mafao, huku mfuko ukiendelea kutekeleza majukumu yake kwa watumishi wa umma na wastaafu.
