Heart Team Africa Foundation (HTAF), kwa kushirikiana na Taasisi ya Moyo ya Jakaya Kikwete (JKCI), imezindua rasmi kampeni ya “Kutoa Ni Moyo”, kampeni ya kitaifa ya kuchangisha fedha na kuongeza uelewa kwa ajili ya kusaidia watoto wanaosumbuliwa na magonjwa ya moyo nchini Tanzania.
Kampeni hii inalenga kuwaunganisha Watanzania kutoka sehemu mbalimbali za jamii katika lengo moja la kuwapa watoto wanaozaliwa na matatizo ya moyo nafasi ya pili ya kuishi kupitia matibabu na huduma muhimu za moyo.
Akizungumza wakati wa uzinduzi wa kampeni hiyo, Mkurugenzi Mtendaji wa JKCI, Dkt. Peter Kisenge, alisisitiza umuhimu wa ushirikiano wa kitaifa katika kusaidia watoto hao.
“Nchini Tanzania, zaidi ya watoto 16,000 huzaliwa kila mwaka wakiwa na matatizo ya moyo. Hii ina maana kuwa kila siku kuna familia zinazopokea taarifa zinazoweza kubadilisha maisha ya watoto wao kabisa,” alisema Dkt. Kisenge.
“Takribani watoto 4,000 nchini wanahitaji upasuaji wa moyo kwa haraka. Kwa familia nyingi, muda si fedha tu bali ni maisha. Kupitia kampeni ya Kutoa Ni Moyo, tunatoa wito kwa Watanzania wote, taasisi, makampuni binafsi na taasisi za serikali kuwa sehemu ya harakati hii ya kuokoa maisha,” aliongeza.
Mpango huu unatekelezwa kwa kushirikiana na Heart Team Africa Foundation (HTAF), taasisi isiyo ya kiserikali inayojihusisha na kusaidia huduma za matibabu ya moyo nchini Tanzania na barani Afrika.
Mkurugenzi Mtendaji wa HTAF, Dkt. Naizihijwa Majani, alisema kampeni hiyo imelenga si tu kuchangisha fedha bali pia kujenga uelewa wa muda mrefu kuhusu afya ya moyo na umuhimu wa jamii kushiriki kusaidia.
“Tanzania ina utamaduni mkubwa wa mshikamano na kusaidiana. Kutoa Ni Moyo inabadilisha michango midogo ya mtu mmoja mmoja kuwa nguvu kubwa ya kitaifa yenye matokeo makubwa. Hii si kampeni ya kuchangisha fedha pekee, ni harakati inayojengwa juu ya huruma, umoja, na imani kuwa kuokoa maisha ya mtoto ni jukumu letu sote,” alisema Dkt. Majani.
Magonjwa ya moyo husababisha vifo vya watu milioni 17.9 duniani kila mwaka, na kuyafanya kuwa chanzo kikubwa zaidi cha vifo duniani.
“Takwimu zinaonyesha mtoto 1 kati ya watoto 100 huzaliwa akiwa na tatizo la moyo. Inawezekana kabisa kuna mtoto katika jamii yako anayepitia changamoto hii kwa ukimya. Hakuna mzazi anayepaswa kuona mtoto wake akiteseka kwa sababu tu hana uwezo wa kugharamia matibabu,” aliongeza.
Kampeni inalenga kukusanya kiasi cha shilingi bilioni 25 kupitia ushiriki wa wananchi, makampuni, wadau wa maendeleo, taasisi mbalimbali, diaspora, watu maarufu, jumuiya za michezo pamoja na jamii kwa ujumla.
Fedha zitakazopatikana zitatumika kusaidia upasuaji na matibabu ya watoto wenye matatizo ya moyo, uchunguzi wa mapema, programu za elimu kuhusu afya ya moyo pamoja na kusaidia familia zinazokabiliwa na changamoto hiyo.
Kampeni hii pia itatumia teknolojia ya kidijitali na mifumo ya kuchangisha fedha mtandaoni ili kurahisisha Watanzania kuchangia kwa uwazi na urahisi kutoka maeneo mbalimbali ndani na nje ya nchi.
Juhudi za awali za uchangishaji zilizofanywa na wadau na washirika tayari zimefanikiwa kukusanya zaidi ya shilingi bilioni 3.08, ikiwa ni fedha taslimu na misaada ya vifaa, jambo linaloonyesha moyo wa Watanzania kusaidiana katika kuokoa maisha.
Kuhusu HTAF
Heart Team Africa Foundation (HTAF) ni taasisi isiyo ya kiserikali inayosaidia mapambano dhidi ya magonjwa ya moyo nchini Tanzania na Afrika kwa ujumla. Taasisi hii inashirikiana kwa karibu na JKCI katika kusaidia huduma za wagonjwa, kuongeza uelewa, kuhamasisha kinga, kuchangisha fedha na kujenga ushirikiano unaolenga kuongeza upatikanaji wa huduma za matibabu ya moyo.
Kuhusu JKCI
Taasisi ya Moyo ya Jakaya Kikwete (JKCI) ni hospitali maalum ya kitaifa inayotoa huduma za matibabu ya moyo nchini Tanzania. Taasisi hii ina jukumu la kutoa huduma bora za matibabu ya moyo, mafunzo na tafiti. Tangu kuanzishwa kwake, JKCI imekuwa mstari wa mbele katika kuimarisha huduma za moyo nchini kwa kutoa matibabu maalum kwa watoto na watu wazima pamoja na kuongeza uwezo wa wataalamu wa ndani.
