Wananchi wa Kata ya Katuma, Halmashauri ya Wilaya ya Tanganyika mkoani Katavi, wanatarajia kunufaika na huduma bora za afya baada ya kukamilika kwa ujenzi wa majengo sita katika Kituo cha Afya Katuma, mradi unaofadhiliwa na mapato yatokanayo na biashara ya kaboni.
Mradi huo una thamani ya zaidi ya Sh milioni 700 na unahusisha vijiji vya Katuma, Kapanga na Mpembe, ukiwa sehemu ya juhudi za kuelekeza mapato ya uhifadhi wa mazingira katika miradi ya kijamii inayowanufaisha wananchi.
Akizungumza wakati wa ziara ya Waziri wa Nchi, Ofisi ya Makamu wa Rais (Muungano na Mazingira), Mhandisi Hamad Yussuf Masauni, katika kata hiyo Oktoba 18, 2026, Katibu wa Kamati ya Ujenzi na Afisa Mtendaji wa Kata ya Katuma, Pascal Masobeji, amesema mradi umekamilisha majengo muhimu kwa ajili ya utoaji wa huduma za afya.
Masobeji amesema kata hiyo imepokea fedha hizo kwa awamu mbili. Katika awamu ya kwanza, iliyohusisha mgao wa awamu ya nne na ya sita, ilipokea Sh milioni 168 kwa ajili ya ujenzi wa jengo la wagonjwa wa nje (OPD).
Amesema mradi huo umeimarisha ushirikiano kati ya kata na vijiji vinavyonufaika na biashara ya kaboni, huku ukionyesha namna mapato yatokanayo na uhifadhi wa mazingira yanavyoweza kutumika kuboresha huduma za kijamii.
Kwa upande wake, Waziri Masauni amewataka wananchi kuendelea kuhifadhi mazingira na kutumia Kituo cha Taifa cha Ufuatiliaji wa Kaboni (NCMC) kupata elimu kuhusu biashara hiyo na taratibu za kusajili miradi.
Amesema serikali itaendelea kusimamia biashara ya kaboni ili kuhakikisha jamii zinazonufaika na uhifadhi wa mazingira zinapata sehemu ya mapato yanayotokana na shughuli hizo.
“Serikali itaendelea kusimamia ili kuona jamii inanufaika na miradi hii, kwa kuwa Wilaya ya Tanganyika imekuwa mfano wa kuigwa katika biashara ya kaboni ambapo imefungua njia kwa wengine kufanya biashara hii,” amesema Masauni.
Ameongeza kuwa serikali itaendelea kufuatilia mgawanyo wa mapato yatokanayo na biashara ya kaboni ili kuimarisha manufaa kwa jamii na kuhamasisha wananchi kuendelea kulinda na kutunza mazingira.
Wananchi wa Kata ya Katuma wameishukuru serikali kwa juhudi za kuhamasisha uhifadhi wa mazingira na kuwezesha mapato ya biashara ya kaboni kuelekezwa katika miradi ya kijamii.
Kukamilika kwa majengo hayo ni hatua katika kuboresha miundombinu ya afya eneo hilo. Hata hivyo, manufaa yake kwa wananchi yatategemea pia upatikanaji wa watumishi, vifaa tiba na dawa pamoja na kuanza kwa huduma katika majengo yaliyokamilika.
