Benki ya NMB imewekeza takribani dola za Marekani milioni 100, sawa na Shilingi bilioni 224, katika mkopo wa pamoja wenye thamani ya dola milioni 500 kwa ajili ya Mgodi wa Dhahabu wa Geita. Mkopo huo, ulioratibiwa na Nedbank Corporate and Investment Banking kwa ajili ya AngloGold Ashanti, unaifanya NMB kuwa benki kubwa zaidi kutoka Tanzania kushiriki katika muamala huo.
Ushiriki huo unaonesha uwezo unaoongezeka wa taasisi za fedha za ndani kuhamasisha mtaji kwa ajili ya uwekezaji mkubwa wa kimkakati. Ufadhili huo unatarajiwa kusaidia kuendeleza uzalishaji wa mgodi, mauzo ya dhahabu nje ya nchi, ajira, ununuzi kutoka kwa wazabuni wa ndani na mapato ya fedha za kigeni.
Mkurungenzi Mtendaji na Afisa Mtendaji Mkuu wa NMB, Ruth Zaipuna, amesema muamala huo ni utekelezaji wa Agenda 2030 ya benki kwa vitendo. Amesema NMB inaendelea kutumia mtaji, utaalamu na ushirikiano wake kuelekeza fedha katika sekta zenye uwezo mkubwa wa kuchochea ukuaji endelevu wa uchumi wa Tanzania.
Hadi sasa, Benki ya NMB imeifadhili sekta ya madini kwa jumla ya takribani Shilingi bilioni 400. Uwekezaji huo pia unaunga mkono Dira ya Taifa ya Maendeleo 2050 kwa kuimarisha mchango wa sekta binafsi, mauzo ya nje, maendeleo ya viwanda, ajira na ushiriki wa biashara za ndani katika mnyororo wa thamani wa madini.
