Dunia imepoteza gwiji wa sayansi na mazingira. Jane Goodall, mwanasayansi aliyebadilisha namna tunavyoelewa tabia na hisia za wanyama, ameaga dunia akiwa na miaka 91.
Kwa mujibu wa taarifa ya Taasisi ya Jane Goodall, mtafiti huyu maarufu alifariki kutokana na sababu za kiasili akiwa California, Marekani, wakati akiwa kwenye ziara ya mihadhara.
Safari Yake ya Maisha na Sokwe
Goodall alianza safari yake ya kipekee mwaka 1960 alipowasili Hifadhi ya Sokwe ya Gombe Stream, Kigoma – Tanzania, baada ya kualikwa na mwanakiolojia mashuhuri, Dkt. Louis Leakey. Akiwa na umri wa miaka 26 pekee na bila shahada ya chuo kikuu, aliamua kufuata ndoto yake ya utafiti wa wanyama.
Kile kilichoanza kama majaribio ya kuvizia sokwe kwenye miti ya Gombe, kiliibuka kuwa utafiti uliobadilisha historia ya sayansi. Goodall aligundua sokwe si tu viumbe wenye akili, bali pia wanaonyesha hisia, huruma, hasira na hata tabia zinazofanana na za binadamu.
Hata hivyo, mwanzo haukuwa rahisi. Sokwe walimkimbia kila alipowakaribia. “Walikuwa hawajawahi kuona nyani mweupe (binadamu mzungu) kabla,” aliwahi kusema Goodall kwa utani katika mahojiano yake mwaka 2019.
Tuzo na Heshima Kubwa
Kutokana na mchango wake mkubwa, Goodall alitunukiwa heshima kadhaa za kimataifa, zikiwemo:
- Dame of the British Empire (2004)
- Presidential Medal of Freedom – Marekani (2025)
- Messenger of Peace – Umoja wa Mataifa (2002)
Umoja wa Mataifa ulimuomboleza kupitia ukurasa wake wa X:
“Goodall alifanya kazi bila kuchoka kwa ajili ya sayari yetu na viumbe wake wote, akiacha urithi mkubwa kwa binadamu na mazingira.”
Urithi Usiofutika
Mbali na vitabu na tafiti, maisha ya Goodall pia yalihifadhiwa kwenye vipindi na filamu, ikiwemo maarufu zaidi “Miss Goodall and the World of Chimpanzees” kilichoonyeshwa mwaka 1965 na CBS, kikimwonesha akiwa Gombe, Tanzania.
Leo, dunia inakumbuka si tu mwanasayansi, bali mtetezi shupavu wa mazingira na mjumbe wa matumaini kwa vizazi vijavyo.
Goodall ataendelea kuishi kupitia sokwe wa Gombe, vitabu vyake, na sauti yake iliyoibua mapinduzi ya kijani duniani. 🌍💚
