Pamba Jiji ya Mwanza imeongeza mkataba na kampuni ya Jambo, mdhamini wake mkuu na mtengenezaji wa vifaa vya klabu hiyo, ikiwemo jezi.
Mkataba huo umesainiwa Agosti 14, 2026, katika Uwanja wa CCM Kirumba wakati wa mapumziko ya mchezo wa Ligi Kuu Bara dhidi ya Dodoma Jiji, uliomalizika kwa sare ya 1-1.
Mkataba huo, ambao thamani yake haijawekwa wazi, umesainiwa na Mwenyekiti wa Bodi ya Pamba Jiji, Constantine Sima, na Mkurugenzi wa Mikakati, Chapa na Matangazo wa Jambo, Nikson George.
Afisa Habari wa Pamba Jiji, Moses William, amesema kuendelea kwa mdhamini huyo kumeipa klabu morali na uhakika wa kutekeleza mipango yake msimu huu.
Amesema mkataba huo umeboreshwa katika baadhi ya vipengele, hali inayofanya Pamba Jiji kuwa klabu inayopokea fedha nyingi zaidi kati ya zinazodhaminiwa na kampuni hiyo, jambo litakalosaidia kulipa mishahara na kuboresha maslahi ya wachezaji.
