DAR ES SALAAM – Chuo Kikuu cha Afya na Sayansi Shirikishi Muhimbili (MUHAS) kimeendesha Kongamano la 15 la Afya ya Kinywa na Meno, likisisitiza umuhimu wa huduma za afya ya kinywa kuingizwa kikamilifu katika mpango wa Bima ya Afya kwa Wote (UHC) ili kuhakikisha Watanzania wote wanapata huduma bora bila kizuizi cha gharama.
Kongamano hilo limewaleta pamoja wataalamu wa afya ya kinywa, watafiti, watunga sera na wadau wa sekta ya afya kujadili changamoto zinazokabili wananchi na jinsi ya kuhakikisha huduma za meno zinapatikana kwa kila Mtanzania.
Akifungua kongamano, Katibu Mkuu wa Wizara ya Afya, Dk. Seif Shekalaghe, alisema Serikali imewekeza zaidi ya Shilingi bilioni 17 katika miaka mitatu iliyopita kununua mitambo na vifaa vya kisasa vya afya ya kinywa, huku akisisitiza kuwa huduma hizi zinapaswa kuwa sehemu ya UHC.
“Afya ya kinywa ni sehemu muhimu ya ustawi wa mwili mzima. Ni lazima tuhakikishe kila Mtanzania anapata huduma hizi, bila kizuizi cha gharama, kupitia mpango wa Bima ya Afya kwa Wote. Pia ni muhimu kuelimisha jamii kupiga mswaki mara mbili kwa siku, kupunguza vyakula vyenye sukari nyingi, na kutembelea madaktari wa meno mara kwa mara,” alisema Dk. Shekalaghe.
Aidha, alilisifu MUHAS kwa ushiriki wake katika utafiti wa kitaifa wa afya ya kinywa na matumizi ya teknolojia za kidijitali, akisisitiza kuwa mashirikiano kati ya sekta binafsi, taasisi za elimu na Serikali ni msingi wa kufanikisha huduma bora za afya kwa wote.
Kwa upande wake, Kaimu Makamu Mkuu wa MUHAS, Prof. Emmanuel Balandya, alisema kongamano hilo linaonyesha juhudi za chuo kuhakikisha elimu ya afya ya kinywa inakuwa endelevu na inagusa maisha ya wananchi moja kwa moja, huku akisisitiza kuwa ubunifu na ujuzi wa kidijitali kwa wataalamu wa meno ni muhimu kufanikisha huduma katika mfumo wa UHC.
Mkurugenzi Msaidizi wa Huduma za Kinywa na Meno, Dk. Baraka Nzobo, alisema utafiti umeonyesha zaidi ya asilimia 70 ya Watanzania wanakabiliwa na matatizo ya meno na fizi, huku uhaba wa wataalamu ukiwa changamoto kubwa kwa upatikanaji wa huduma za afya ya kinywa.
Kongamano hilo limeibua mjadala mpana kuhusu kuweka huduma za kinywa katika Bima ya Afya kwa Wote, likisisitiza kuwa elimu, tabia bora za kiafya, na huduma zenye upatikanaji rahisi ni nguzo muhimu za kuendeleza afya bora na tabasamu endelevu kwa Watanzania wote.
