Chuo Kikuu cha Afya na Sayansi Shirikishi Muhimbili (MUHAS) kimeimarisha ushirikiano na Chuo Kikuu cha Ankara pamoja na Shirika la Ushirikiano na Uratibu la Türkiye (TİKA), kwa lengo la kuendeleza huduma za afya za kibingwa, mafunzo, utafiti na ubunifu nchini Tanzania.
Makamu Mkuu wa MUHAS, Prof. Apollinary Kamuhabwa, amesema hayo jijini Dar es Salaam wakati wa uzinduzi wa kitengo maalumu cha matibabu ya meno kwa watoto wanaohitaji dawa za usingizi au ganzi, pamoja na kusainiwa kwa hati ya makubaliano (MoU) kati ya taasisi hizo.
Amesema kitengo hicho, kilichoanzishwa katika Shule ya Meno ya MUHAS, tayari kimeanza kutoa huduma kwa watoto wenye matatizo ya kinywa na meno ambao hawawezi kufanyiwa matibabu wakiwa macho.
Kwa mujibu wa Prof. Kamuhabwa, tangu huduma hiyo ilipoanza mwezi Mei mwaka huu, watoto 27 tayari wamepatiwa matibabu.
“Moja ya mafanikio makubwa ya ushirikiano huu ni kuanzishwa kwa kliniki maalumu kwa ajili ya watoto wenye matatizo ya kinywa na meno wanaohitaji upasuaji kwa kutumia dawa za usingizi. Huduma hii haikuwahi kupatikana nchini Tanzania,” amesema.
Amesema huduma hiyo ni muhimu kwa watoto wanaoogopa sindano, wasioweza kuvumilia matibabu ya meno wakiwa macho au wenye changamoto za kiafya zinazofanya matibabu ya kawaida kuwa magumu.
Prof. Kamuhabwa amesema wataalamu wa MUHAS, wakiwemo madaktari wa meno, wataalamu wa usingizi na ganzi, wataalamu wa maabara na wauguzi, wamekwenda Chuo Kikuu cha Ankara kwa mafunzo, huku wataalamu kutoka Türkiye wakifika Tanzania kwa ajili ya kujenga uwezo wa wataalamu wa ndani.
Amesema TİKA na Chuo Kikuu cha Ankara pia vimeunga mkono mpango huo kwa kutoa vifaa tiba pamoja na utaalamu wa kitaalamu.
“Hatua inayofuata ni kuongeza idadi ya wataalamu, kupata vifaa zaidi na kupanua huduma hii ili watoto wengi zaidi waweze kunufaika,” amesema.
Ushirikiano katika huduma za dharura
Prof. Kamuhabwa amesema ushirikiano huo pia umejikita katika huduma za tiba za dharura, ambapo MUHAS imepokea gari la wagonjwa linalotumika kutoa huduma na kuwafundisha wanafunzi.
Amesema chuo hicho kinaandaa mpango wa kuanzisha mafunzo kwa wahudumu wa huduma za dharura, watakaokuwa na jukumu la kutoa huduma ya kwanza na kumhudumia mgonjwa kabla hajafikishwa hospitalini.
“Mpango huu utaimarisha uwezo wa Tanzania wa kukabiliana na dharura, hususan katika usimamizi wa ajali, kuhakikisha njia ya hewa inabaki wazi na kumstabilisha mgonjwa kabla ya kufikishwa hospitalini,” amesema.
Amesema mpango huo una umuhimu zaidi wakati Tanzania, Kenya na Uganda zikijiandaa kwa pamoja kuandaa Fainali za Kombe la Mataifa ya Afrika (AFCON) mwaka 2027, hali inayoweza kuongeza mahitaji ya wataalamu wa huduma za dharura.
Kuhusu hati ya makubaliano iliyosainiwa, Prof. Kamuhabwa amesema haijaweka kiwango maalumu cha fedha, bali imeweka msingi wa taasisi hizo kuandaa na kutekeleza miradi ya pamoja na kutafuta fedha kutoka TİKA na washirika wengine wa maendeleo.
Amesema ushirikiano huo utasaidia kukabiliana na upungufu wa wataalamu waliobobea katika matibabu ya meno kwa watoto na kuongeza upatikanaji wa huduma za afya ya kinywa kwa watoto.
Ankara University yaahidi kupanua ushirikiano
Kwa upande wake, Mkuu wa Chuo Kikuu cha Ankara, Prof. Dr Necdet Ünüvar, amesema kuanzishwa kwa kitengo hicho pamoja na ushirikiano katika tiba za dharura ni hatua muhimu katika kuimarisha uhusiano kati ya taasisi hizo.
“Matibabu ya meno kwa watoto kwa kutumia dawa za usingizi ni eneo muhimu na lenye changamoto, hivyo kuanzishwa kwa kitengo hiki ni hatua kubwa kwa Tanzania,” amesema.
Prof. Ünüvar amesema Chuo Kikuu cha Ankara kiko tayari kupanua ushirikiano wa kitaaluma na kitaalamu na MUHAS, hususan katika sayansi za afya.
TİKA yaeleza mchango wake
Mkurugenzi wa TİKA nchini Tanzania, Halim Ömer, amesema shirika hilo limetekeleza zaidi ya miradi 350 ya ushirikiano nchini Tanzania katika sekta mbalimbali, ikiwemo elimu, kilimo, mifugo, afya, mafunzo ya ufundi, maji na usafi wa mazingira.
Amesema TİKA imewezesha kitengo cha meno kwa kutoa vifaa vya ganzi, vifaa vya meno, vifaa vya kusaidia njia ya hewa kwa watoto, vifaa vya kupumulia pamoja na vifaa vya huduma za dharura.
Ömer amesema mpango wa kuanzisha shule ya wahudumu wa huduma za dharura utajengwa juu ya mafunzo ya kukabiliana na majanga na dharura yaliyotolewa mwaka 2024, ambapo zaidi ya madaktari 50 wa huduma za dharura walipatiwa mafunzo.
“Shule hiyo itasaidia kuandaa wataalamu wenye sifa katika huduma za afya za dharura na kuimarisha uwezo wa Tanzania wa kukabiliana na dharura kwa muda mrefu,” amesema.
Utafiti na ubunifu waongezwa kwenye ushirikiano
Mkuu wa Shule ya Meno ya MUHAS, Prof. Ferdinand Machibya, amesema ushirikiano huo unaweza kupanuliwa katika maeneo ya utafiti wa pamoja, mafunzo ya uzamili, kubadilishana wanafunzi na wataalamu, matumizi ya akili bandia katika uchanganuzi wa picha za kitabibu, kujenga uwezo wa huduma za tiba na kuandaa maombi ya pamoja ya ruzuku.
“Mafanikio ya ushirikiano huu hayapaswi kupimwa kwa idadi ya makubaliano yaliyosainiwa pekee, bali kwa utafiti wa pamoja, wanafunzi na wasomi waliopata mafunzo, ubunifu, machapisho, ruzuku na maboresho ya afya katika jamii,” amesema.
